„ეუთო/ოდირს რისი თქმაც უნდოდა, გასაგებად თქვა, რომ ქართველ ხალხს ჰყავს არჩეული ხელისუფლება“, - ამის შესახებ პარლამენტის თავმჯდომარემ შალვა პაპუაშვილმა სოციალურ ქსელში ფეისბუკის პირად გვერდზე დაწერა.
როგორც პაპუაშვილმა აღნიშნა, დეზინფორმაციაა ის, თითქოს ეუთო/ოდირმა არჩევნები სიტყვებით „თავისუფალი და სამართლიანი“ უნდა შეაფასოს, იმისთვის, რომ ის შემდგარად ჩაითვალოს.
„დეზინფორმაციაა, თითქოს ეუთო/ოდირმა არჩევნები სიტყვებით „თავისუფალი და სამართლიანი“ უნდა შეაფასოს, იმისთვის, რომ ის შემდგარად ჩაითვალოს.
სხვათა შორის, ამ დეზინფორმაციას 2020 წელს ოპოზიცია ავრცელებდა, თუმცა ბოლოს მათაც მოუწიათ უარყოფა.
ეუთო/ოდირის სადამკვირვებლო მისიასთან ჩემი შეხვედრისას ამ მოსალოდნელ დეზინფორმაციაზეც მქონდა საუბარი და მივიღე მკაფიო დასტური, რომ ეს არ არის ტერმინი, რომელსაც ეუთო/ოდირი თავის ანგარიშში იყენებს.
ამიტომ არის, რომ არც აშშ-ის, არც საფრანგეთის, არც პოლონეთის, არც ბელგიის და, თქვენ წარმოიდგინეთ, არც მოლდოვის არჩევნები მას "თავისუფალ და სამართლიან" არჩევნებად არ შეუფასებია.
ეუთო/ოდირს რისი თქმაც უნდოდა, გასაგებად თქვა, რომ ქართველ ხალხს ჰყავს არჩეული ხელისუფლება.
ყველამ, შინ და გარეთ, პატივი უნდა სცეს ქართველი ხალხის არჩევანს.
„ქართული ოცნების“ 54% და 1 119 908 ამომრჩევლის ხმა საკმაოზე მეტად მკაფიო და მჭექარეა, რომ ვინმემ მისი წაყრუება სცადოს“, - წერს სოციალურ ქსელში შალვა პაპუაშვილი.
