„სამარცხვინოა ერთ სიბრტყეში დაყენება კრიმინალების და ივანიშვილის“, - ამის შესახებ „ქართული ოცნების“ ლიდერმა ანრი ოხანაშვილმა „საზოგადოებრივ მაუწყებელს“ განუცხადა.
მისი განცხადებით, პრეზიდენტმა უნდა ისაუბროს იმ საკითხებზე, რაზეც თვითონ დაიწყო საუბარი.
„ქალბატონმა პრეზიდენტმა უნდა ჩაიხედოს, ან ურჩიონ, რომ ჩაიხედოს ევროკავშირის ანგარიშში, რომ საქართველო არის ლიდერი იმ ტრიოს შორის, რასაც ჰქვია ევროინტეგრაციაში დაახლოება.
რაც შეეხება შემდეგ განცხადებას, სამარცხვინოა ასევე, რომ თურმე კრიმინალი სააკაშვილი და სტრასბურგის მიერ არაერთხელ მხილებული სააკაშვილი, გვარამია უნდა ახსენო იმავე კონტექსტში, რა კონტექსტშიც უნდა ახსენო ბიძინა ივანიშვილი.
სამარცხვინოა ერთ სიბრტყეში დაყენება კრიმინალების და იმ ადამიანის, რომელმაც ჩვენს ხალხს და ჩვენს ქვეყანას კრიმინალებისგან თავი დააღწევინა.
ეს არის ფაქტების თავდაყირა დაყენება, ამიტომ, ჩამობრძანდეს პრეზიდენტი. მან უნდა ისაუბროს იმ საკითხებზე, რაზეც თვითონ დაიწყო საუბარი“, - განაცხადა ანრი ოხანაშვილმა.
