ევროპის კლუბების ასოციაციამ (ECA), რომელიც უეფა-ში კლუბების ინტერესებს წარმოადგენს, რუსეთის წარმომადგენლები გარიცხა.
გადაწყვეტილების თანახმად, „ზენიტი“, „სპარტაკი“, „რუბინი“, ცსკა, „როსტოვი“, „კრასნოდარი“ და „ლოკომოტივი“ ევროპული კლუბების ასოციაციის წევრები აღარ არიან.
„ECA-მ ასევე მტკიცედ დაუჭირა მხარი უეფა-ს აღმასრულებელი კომიტეტის გადაწყვეტილებას ჩემპიონთა ლიგის ფინალის პეტერბურგიდან პარიზში გადადების შესახებ“, - წერია ორგანიზაციის ოფიციალურ გვერდზე გავრცელებულ განცხადებაში.
გარდა ამისა, ორგანიზაციამ დღესვე გადაწყვიტა, რომ ყველა რუსული გუნდი დაუყოვნებლივ შეწყვეტს მონაწილეობას ECA-ს საქმიანობაში.
