აშშ-ის პრეზიდენტმა დონალდ ტრამპმა თითქმის 3-საათიანი მოლაპარაკებების შემდეგ უკრაინელ კოლეგასთან, ვოლოდიმირ ზელენსკისთან შეხვედრას „შესანიშნავი“ უწოდა.
„შესანიშნავი შეხვედრა გვქონდა. ბევრი რამ განვიხილეთ“, - აღნიშნა ტრამპმა ზელენსკისთან მარ-ა-ლაგოში გამართულ ერთობლივ ბრიფინგზე.
მისივე თქმით, ახლა უფრო ახლოს არიან შეთანხმებასთან.
„ვფიქრობ, რომ ჩვენ ბევრად უფრო ახლოს ვართ, შესაძლოა ძალიანაც“, - თქვა ტრამპმა.
ასევე ტრამპი აცხადებს, რომ სამშვიდობო მოლაპარაკებებში „ერთი ან ორი ძალიან რთული საკითხი“ რჩება.
მან უარი თქვა შეთანხმებული პირობების პროცენტული მაჩვენებლის დასახელებაზე, მაგრამ აღნიშნა, რომ ის შეიძლება 95%-ს მიუახლოვდეს.
ტრამპის თქმით, აღმოსავლეთ დონბასის რეგიონის ბედი, რომლის დათმობასაც უკრაინისგან რუსეთი ითხოვს, კვლავ გადაუჭრელ საკითხად რჩება.
„ჩვენ ვუახლოვდებით ამ საკითხზე შეთანხმებას. და ეს დიდი საკითხია, რა თქმა უნდა, ეს ერთ-ერთი დიდი საკითხია და მე ვფიქრობ, რომ ჩვენ უფრო ახლოს ვართ“, - განაცხადა მან.
ტრამპმა, სამშვიდობო მოლაპარაკებების მიმართ ნდობის გამოხატვისას, ხაზი გაუსვა, რომ მოლაპარაკებები კვლავ ძალიან რთულია და უარი თქვა მათი გადაწყვეტის ზუსტი ვადების დასახელებაზე.
„ვფიქრობ, რამდენიმე კვირაში გავიგებთ - ასე თუ ისე“, - განუცხადა აშშ-ის პრეზიდენტმა ჟურნალისტებს.
