2026 წლის ბიუჯეტის პროექტის თანახმად, 70 წელს ზემოთ მყოფი პირებისთვის პენსიის 45 ლარით, 70 წლამდე მოქალაქეებისთვის კი 20 ლარით გაზრდა იგეგმება.
პროექტით, ჯანდაცვისა და სოციალური დაცვის პროგრამების დასაფინანსებლად სამინისტროს დაფინანსება გაზრდილია 840,0 მლნ ლარზე მეტით, რომლის ფარგლებში გათვალისწინებულია:
70 წლის და მეტი ასაკის პენსიონერთა პენსია იზრდება 45 ლარით და განისაზღვრება 495 ლარის ოდენობით. ამავე კატეგორიის პენსიონერთა პენსია მაღალმთიან დასახლებებში თითქმის 594 ლარს გაუტოლდება; 70 წლამდე პირთა პენსია იზრდება 20 ლარით და განისაზღვრება 370 ლარის ოდენობით, ხოლო მაღალმთიან დასახლებებში 444 ლარი იქნება; გარდა პენსიისა, გათვალისწინებულია მკვეთრად გამოხატული და 18 წლამდე შშმ პირების სოციალური გასაცემლის ზრდა 45 ლარით, ხოლო დანარჩენი კატეგორიის შშმ პირთა გასაცემლის ზრდა 20 ლარით; ჯამში სოციალური პროგრამების დაფინანსება 6,9 მილიარდ ლარს აჭარბებს;
ჯანდაცვის პროგრამების დასაფინანსებლად გამოყოფილია 2,2 მილიარდ ლარზე მეტი, მათ შორის გათვალისწინებულია პირველადი ჯანდაცვის პერსონალის ხელფასების 10%-იანი ზრდა;
დევნილთა სახლებით უზრუნველყოფის მიზნით გათვალისწინებულია 240,0 მლნ ლარი.
გარდა ამისა, 2026 სახელმწიფო ბიუჯეტის პროექტის თანახმად, მოსახლეობის ჯანმრთელობის დაცვისთვის 2 219,9 მლნ ლარია გათვალისწინებული, მათ შორის საყოველთაო ჯანდაცვის დაფინანსება შეადგენს 1 500,0 მლნ ლარს, რაც პროექტის წინა ვერსიასთან შედარებით 150,0 მლნ ლარით იზრდება.
ამასთან, დოკუმენტის თანახმად, სამედიცინო დაწესებულებათა რეაბილიტაციასა და აღჭურვისთვის 80,0 მლნ ლარია გამოყოფილი. შრომისა და დასაქმების სისტემის რეფორმების პროგრამისთვის გათვალისწინებულია 21,6 მლნ ლარი.
„აღნიშნული პროგრამის ფარგლებში, პროექტის წინა ვერსიით გათვალისწინებული იყო საზოგადოებრივ სამუშაოებზე დასაქმების ხელშეწყობის მიზნით შესაბამისი ასიგნებები. აღნიშნულ ქვეპროგრამას მიმდინარე წელს შეუსრულდა 4-წლიანი ციკლი, რაც თავდაპირველად იყო დაგეგმილი. ამავდროულად, ბოლო წლების მაღალი ეკონომიკური ზრდის პარალელურად, ფიქსირდება სამუშაო ძალის დეფიციტი შრომის ბაზარზე. შესაბამისად, მიზანშეწონილად ჩაითვალა მომდევნო პერიოდში აღარ გაგრძელდეს პროგრამა არსებული სტრუქტურით და მის ბენეფიცირებს სხვადასხვა გადამზადების პროგრამებით ხელი შეეწყოს კერძო სექტორში დასაქმების მიმართულებით“, - ნათქვამია ინფორმაციაში.
ასევე, იძულებით გადაადგილებულ პირთა და მიგრანტთა ხელშეწყობისთვის გამოყოფილია 263,7 მლნ ლარი.
